Annuaire électronique International En Vidéo

لحظة من فضلك

* إلقى عشير..

fatma chrifيمكن يلزمك توفى صغرك تلوّج على صاحب نهارت الي تكبر ويصير معاك اكسيدون في الحياة تلقاه نعرف عباد وحلت خاطر عداو صغرهم يخدمو و يقراو ويلعبو ... ونساو يعملو صاحب يحكيولو على حاجات ما ينجمو يقولوهم لحد كي كبروا فما شكون اختار يحط نهاية لكلامو مع روحو بانو يحط نهاية لحياتو ك كل يمكن يلزمك تتعب سنين و تجرب عشرات السنين بش تلقى حد كي تمشيلو تقلو نحب حد اصغر مني يحل يديه و يعنقك و يفرحلك الي حبيت.. وما يعملكش استاذ نصوح و يقعد يقلك ما يجيش خاطر حالتك الاجتماعية لا تسمح يمكن يلزمك حد يهبل معاك نهارت الي تهبل و ما يشدكش بحبال مسّخة للقاع.. ساعات يصيرولك حاجات تخاف تحكيهم.. انت تعيس بالحق كان في هالناس الي دايرين بيك الكل ما تنجّم تثيّق حد و تحكيلو بهّمك و تحكيلو بسرك و تحكيلو بشي يوجع فيك و ما تنجمش تقولو للي يجي يلزمك تلقى حد ماهوش الي يجي بش تنجم تقسم معاه الحاجات الي تعبتك من كثر ما هزيتهم وحدك الفالك حد يتعب معاك في تعبك و يفرحلك في فرحك .. و تنجّم نهارت الي تصيرلك حادث عرضي في حياتك تخمم فيه هو اول حد .. وتجريلو بش ترجع لتوازنك هال"حد" يمكن ياسر يكون سكّوتي .. حشاّم .. راسي واطي ... تافه .. حقير .. جن ازرق .. مهبّط لقشة مالسماء .. عاقل ياسر و لا هامل ياسر .. المهم معاك انت تعرفو كيفاش يتعامل.. يدفن معاك الحاجات تحت الزليزية و يخرج يضحك كاينو لا صار و لا كان .. القالك حد مادامك مازلت صغير و تنجّم تجرّب و عندك وقت تحاول و تشوف .. البس و انزع لين تلقى قياسك.. المهم ما تخرج من الدنيا كان بيه ..القى عشير.. لايامات السواد و المداد .. للمصايب الي مازالت ما جاتش و الي كي تتفكر الي انت بش تعيشها وحدك تسيخ بيك القاع و الدنيا .. و ما تقليش برشا عباد تحبني .. يلزمك عبد واحد بركا يحبك برشا.. خاطر يحبك و كهاو في هالزمان الاغبر ماعادش تكفي.. يلزم حد تعرفو كيما تعرف تراكن روحك من داخل .. كيما تعرف بدنك .. يعرف غلطاتك الاولانين و نساهم .. ويعرفك ديفوواتك و مغمض عليهم عينيه و يحبك كيما انت ب باهيك ب خايبك القالك حد تعكّز عليه ... يشرب معاك التاي في العشويات المغيّمة .. و يسمعك و ما يقلكش ما تبكيش .. القالك حد يقلك ابكي بش ترتاحوالدنيا بنت ستين كلب والعالم الاغبر الي جينا فيه ماهوش متاعنا ..فتّش عليه في الشوراع و الزناقي و القهاوي و اصحاب القسم و العباد الي حبيتهم و الي حبوك و معارفك و قرايبك و عايلتك الكبيرة و الصغيرة .. فتّش عليه في الناس الي تقعد تقرا بجنبك في جاردان بوبليك.. وفي العباد الي سنين ربي تسكن حذاك و تاخو معاك الميترو .. و في العباد الي ريتهم مرة بركا و قعدت تتفكرهم العمر لكل ... لوّجو بالفتاشة و ما تعياش و ما تتعبش و ما تكلّش و ما تملّش .. و ما تفكّش الاما تلقاه ..تحبّلك سنين تجرّب فيه يركب على قطايع مخك و لا لا ... تحبلك سنين تحاول معاه لين يفهم معدنك .. تحبلك سنين لين تتعلّم تسكت وقتلي هو يبدا ما يحبش يحكي و يتعلّم هو يحكي وقتلي انت تحب تتونّس ..ألقى حد يبخٍّر بريحة ام كلثوم و فيروز و كي يلقى تسمع فيها و تبكي يقلّك "والله في صوتهم حاجة تبكّي "القى حد قبل ما توصل للشيرة المزمرة من العمر و انت وحدك .. القى عشير كبير .. القى صاحب ..القى غشّير .. يصبّرك على همك و يستنى معاك الموت و ما يقلقش من حديثك على الحاجة الي تعاودلو فيها للمرة الميتين.. القى حد ما تبدلوش معاك السنين ..وما يعرفش ينصح .. وما يحكيش معاك من فوق .. و يعرف يسمع و يعرف ينسى .. و يعرف يحبّ .. وما تبدلوش السنين..

فاطمة الشريف